Poliisi y’e Kira etandiise okunoonyereza ku ngeri omwana Emmanuel Okello, 18, abadde mu S4 ku Makerere College School gye yetugidde ku nnyumba.
Okello kati omugenzi abadde mutabani wa Moses Opio, omutuuze ku kyalo Parliament village- Kitukutwe, Kiwologoma mu Monicipaali y’e Kira mu disitulikiti y’e Wakiso.
Poliisi egamba nti olunnaku olw’eggulo ku Mmande nga 10, Janwali, 2022, taata Opio bwe yabadde agenze ku ssomero okutwala abaana abalala, Okello yagaddewo ennyumba era yasangiddwa nga yetugidde mu Kompawundi.
Asp Luke Owoyesigyire, amyuka omwogezi wa Poliisi mu Kampala n’emirirwano, agamba nti taata Opio asobodde okutegeeza Poliisi nti Okello yali yamutegezaako nti tayagala kuddayo ku ssomero lya Makerere College.
Taata Opio abadde yafunidde Okello essomero eddala erya St Kizito SS Namugongo kyokka teyabadde musanyufu nga talyagadde.
Mu sitetimenti ya Poliisi, taata Opio agamba nti mutabani we Okello okugaana amassomero gombi (Makerere College School ne St Kizito SS Namugongo) eyinza okuba emu ku nsonga lwaki yesse.
Owoyesigyire agamba nti omulambo gutwaliddwa mu ddwaaliro ekkulu e Mulago okwekebejjebwa naye okunoonyereza okuzuula ekituufu ekyavuddeko Okello okwetta, kugenda mu maaso.
Mu kiseera kino abaana abali kudda ku massomero oluvanyuma lw’emyaka egigenda kumpi ebbiri (2) nga bali waka wakati mu kulwanyisa Covid-19.
Ate entiisa ebuutikidde abasuubuzi mu Katale k’e Nakasero mu Kampala, omutembeyi Elizabeth Kakayi myaka 60 bw’akutuse naafa omulundi gumu.
Kakayi, afudde ku ssaawa 5 n’eddakika 20 ez’okumakya ga leero, ekirese abasuubuzi nga bali maziga.
Okusinzira ku batembeyi, Kakayi abadde ne banne nga banyumya era agudde wansi omulundi gumu, okumwekebejja ng’amaze okufa.
Amangu ddala Poliisi eyitiddwa era omulambo gutwaliddwa mu ddwaaliro ekkulu e Mulago okwekebejjebwa.
Luke Owoyesigyire, amyuka omwogezi wa Poliisi mu Kampala n’emirirwano agamba nti Poliisi ku CPS etandiise okunoonyereza okuzuula ekivuddeko Kakayi okufa.
Abamu ku basuubuzi bagamba nti embeera mbi omuli okunoonya ssente nga balwadde, eyinza okuba emu ku nsonga lwaki Kakayi afudde kuba abadde mukyala mukozi nnyo.
Ebirala ebifa mu ggwanga – https://www.youtube.com/watch?v=HbRAc1f8jYw
