Poliisi etandiise okunoonyereza ku kyavuddeko omuliro okutta abayizi bana (4) n’okulumya abalala basatu (3) ku ssomero lya New Crest Junior ku Kibedi Day and Boarding Primary School mu Divizoni y’e Kawempe mu Kampala ku Lwomukaaga ekiro.
Okusinzira ku ASP Luke Owoyesigyire, amyuka omwogezi wa Poliisi mu Kampala n’emirirwano, omuliro gwatandiise ku ssaawa 9 ez’ekiro ekisulo ky’abayizi abawala.
Abaana abaafiridde mu muliro kuliko Tena Denge, Bashira Nabawesi ne Julian Nakalanzi bonna okuva mu P1 ne Hasina Nakawuki myaka 7 okuva mu P2.
Ate abaafunye ebisango, bali mu ddwaaliro e Kyadondo mu zzooni y’e Kiwowera mu Kawempe, okufuna obujanjabi.
Owoyesigyire agamba nti wadde Poliisi eri mu kunoonyereza ku kyavuddeko omuliro, obulagajjavu bw’essomero, eyinza okuba emu ku nsonga lwaki, omuliro gwatuuse n’okutta abaana.
Wadde abakulu ku ssomero bakyagaanye okuvaamu ekigambo kyonna, omu ku basomesa agaanye okwatuukiriza amannya ge, agambye nti oluvanyuma lw’omuliro, aba UMEME batuuse ku ssomero era bagambye nti omuliro tegwavudde ku masanyalaze.
Ate Owoyesigyire agamba nti waliwo abasomesa basatu (3) abagiddwako sitetimenti, okuyambako mu kunoonyereza kwa Poliisi okuzuula ekyavuddeko omuliro.
Abaana bagiddwa mu ddwaaliro e Kyadondo, ne batwalibwa mu ddwaaliro ekkulu e Mulago, okwongera okufuna obujanjabi.
Stella Nandaula, yakubye omulanga oluvanyuma lw’okutegeezebwa nti muganda we Nakalanzi y’omu ku baana abafiiridde muliro.
Peter Omoding, nga y’omu ku bazadde abalina abaana ku ssomero mu kibiina ekyokutaano (P5) agamba nti kati ye ssaawa amassomero okwongera amaanyi ku nsonga y’ebyokwerinda, okwetangira embeera y’emu okuddamu omuli omuliro.
Ate Lukyamunzi Toney, neyiba ku ssomero agamba nti poliisi ezikiriza omuliro yatuuse kikerezi nnyo olw’abakulu ku ssomero n’abasomesa, obutaba na ssimu yaabwe.
Mu kiseera kino Owoyesigyire agamba nti Poliisi y’e Kawempe etandiise okunoonyereza, okuzuula ekituufu ku kyavuddeko omuliro.
Ate olukiiko lw’ebyokwerinda mu disitulikiti y’e Kyotera n’olukiiko lw’ebyenjigiriza bakkiriziganyizza essomero lya St. John’s Day and Boarding Primary School, okusigala nga basomesa abayizi.
Olukiiko lwatudde olunnaku olw’eggulo ku Lwomukaaga nga kivudde ku muliro okukwata essomero ne gutta omwana Savio Kasozi P4.
Wadde abakulu ku disitulikiti baabadde balagidde essomero okuggalwa, abakulu bazzeemu ne batuula ne bakaanya, essomero okusigala nga ligguddwawo.
John Paul Mpalanyi, omubaka we Kyotera, agamba nti wadde essomero ligguddwawo, balina okubudabuda abaana n’abazadde.
Ate Rose Nantongo, omubaka omukyala e Kyotera awanjagidde Gavumenti okuyambako amassomero g’obwannanyini ku nsonga y’ebyokwerinda.
Ebirala ebifa mu ggwanga – https://www.youtube.com/watch?v=Z1dtgoYt2nE
