Abasibe, Allan Ssewanyana omubaka we Makindye West ne Mohammad Ssegirinya omubaka we Kawempe North, bawanjagidde omulamuzi wa kkooti esookerwako e Masaka Philp Nzwebe, okukyusibwa ekkomera, okubaggya mu kkomera e Kigo.
Wadde Ssegirinya ne Ssewanyana bali ku misango egiwerako, enkya ya leero, basimbiddwa mu kkooti e Masaka ku misango gy’obutemu, egy’abaggulwako amangu ddala nga bazzeemu ne bakwattibwa.
Kigambibwa benyigira mu kutta Joseph Bwanika, eyali omutuuze ku kyalo Kisekka B mu ggoombolola y’e Kisekka mu disitulikiti y’e Lwengo, mu kitta bantu ekyali e Masaka, wakati w’omwezi Ogwomusanvu n’Ogwomunaana, 2021, omwafiira abantu abasukka 20.
Mu kkooti, nga basinzira ku nkola eya ‘Zoom’ okuva mu kkomera e Kigo, omulamuzi Nzwebe ayongezaayo omusango gwabwe okutuusa nga 2, omwezi ogujja Ogwokubiri, 2022, nga kivudde ku ludda oluwaabi nga lukulembeddwamu Richard Birivumbuka okutegeeza nti bakyanoonyereza.
Munnamateeka w’abasibe era omubaka omukyala owa Kampala Malende Shamim, agamba nti okulwawo okunoonyereza, kyongera okutyoboola eddembe ly’abantu be era mu kkooti abaddeyo nga bongezaayo omusango.
Mu kkooti, Ssewanyana awanjagidde omulamuzi Nzwebe okubaggya mu kkomera e Kigo okusinga okubalinda okuttibwa.
Ssewanyana agamba nti ye ne Ssegirinya, basukkiridde okubatimpula emiggo, okubaanika mu kasana, okubatiisatiisa ssaako n’okubatulugunya.
Bw’abadde alambika embeera gye balimu, Ssewanyana kabuze kata akulukuse amaziga, kwe kusaba omulamuzi akkirize okubakyusa ekkomera kuba embeera gye balimu, eyinza okubasindikiriza okwetta.
Poliisi mu Kampala ekutte abantu, abagambibwa okwenyigira mu kutigomya bannakampala nga basinzira ku Clock Tower mu Kampala ku luguudo oludda e Ggaba, Ntebe.
Mu kikwekweeto ekikoleddwa Poliisi y’e Katwe, 13 bakwattiddwa era basangiddwa n’ebintu eby’enjawulo omuli Sipaana, magalo, obusimu obw’enjawulo, obusawo, emisokoto gy’enjaga era baguddwako emisango egy’enjawulo omuli okubbisa eryanyi.
Okusinzira ku Luke Owoyesigyire, amyuka omwogezi wa Poliisi mu Kampala n’emirirwano, mu kikwekweeto, Ibrah Jemba abadde akulembera ababbi mu kunyakula amassimu, okubba ensawo z’abakyala, okuba abasuubuzi, naye akwattiddwa.
Owoyesigyire agamba nti abakwate mu kiseera kino bali ku Poliisi e Katwe era essaawa yonna bagenda kubatwala mu kkooti nga ebikwekweeto bikyagenda mu maaso mu bitundu bye Kampala eby’enjawulo.
Ebirala ebifa mu ggwanga – https://www.youtube.com/watch?v=N4ylVTq6sWE&t=406s
