Poliisi ekutte abasirikale mukaaga (6) abagambibwa okwenyigira mu kutiisatiisa omuyimbi Moses Ssali amanyikiddwa nga Bebe Cool ku Poliisi y’e Ntinda nga beyambisa emmundu ku Ssande ekiro nga 19, omwezi guno Ogwomukaaga.
Bebe Cool yali ku Poliisi y’e Ntinda gye yali ayitiddwa, okugibwako sitetimenti ku by’omusirikale Captain Namara okutomera emmotoka ye, nga bali mu paakingi ya Peer lounge, ebbaala eri mu bitundu bye Ntinda.
Kigambibwa mu kuwanyisiganya ebisongovu, Captain Namara yaggyayo emmundu ekika kya Pisito ekyaviirako Bebe Cool ne banne, okumukuba empi n’ebikonde.
Wabula Bebe Cool agamba nti nga batuuse ku Poliisi y’e Ntinda, Captain Namara gye yali atwaliddwa, waliwo abasirikale abalumba Poliisi nga bakutte emmundu ne batwala Captain Namara ate ye ne batiisatiisa okumukuba amasasi.
Luke Owoyesigyire, amyuka omwogezi wa Poliisi mu Kampala n’emirirwano, agamba nti Poliisi, esobodde okufuna obutambi obulaga embeera yonna nga bwe yali, okuzuula ekituufu nga n’abasirikale 6, abagambibwa okutiisatiisa Bebe Cool bakwattiddwa.
Owoyesigyire agamba nti wadde Bebe Cool agiddwako sitetimenti, Captain Namara akyali mu ddwaaliro, agamba nti bamukuba nnyo.
