Sandra atabukidde Daniella ‘wesonyiwe ensonga z’amaka gange’
Kyaddaki kabiite w’omuyimbi Weasel Manizo, Sandra Teta avuddeyo ku nsonga ezirudde nga zitambula mu mawulire n’okusingira ddala ku mikutu migatta bantu omuli Face Book, WhatsApp n’emirala.
Amawulire galudde nga gatambula oluvanyuma lw’ebifaananyi okufuluma nga Sandra Teta ali mu mbeera mbi nga yenna akubiddwa.
Kigambibwa bba Weasel yamukuba nga kivudde ku butakaanya wakati waabwe.
Sandra avuddeyo nga mukoowu!
Wadde waliwo bannayuganda abaludde nga basaba Poliisi okunoonya Weasel ku misango gy’okukuba mukyala we Sandra, nate ebintu birabika bikyuse.
Sandra asobodde okweyambisa omukutu ogwa Tik Tok okutabukira mukyala w’omuyimbi Jose Chameleone, Daniella Atim Mayanja ne mukyala wa Buchaman, Maama Ghetto, abaludde nga batambuza amawulire n’okusaba Poliisi okuvaayo ku nsonga ya Weasel okukuba Sandra.
Sandra asobodde okusaba Daniella ne Maama Ghetto okwesonyiwa ensonga za famire ye.
Sandra agamba nti akoze ebintu eby’enjawulo okutunda erinnya lye nga kiswaza Daniella ne Maama Ghetto okwagala okulitta.
Agamba nti wadde Daniella ne Maama Ghetto baludde nga bavaayo okulaga nti bafaayo, tewali yali amukubiddeko ku ssimu, okutegeera ensonga zonna wabula baludde nga batambulira mu lugambo.
Sandra agamba nti agenda kwekolera ku nsonga za Famire ye ne Weasel okusinga abantu okudda mu kutambuza ebigambo eby’obulimba.
Ssenga Kawomera ayogedde!
Ssenga Kawomera agamba nti mu nsi, omukwano gukyusa ebintu bingi era omukyala ng’ali mukwano oba omusajja, asobola okwewunyisa abantu.
Kawomera agamba nti Sandra okuvaayo okulabula abantu okwesonyiwa ensonga za famire ye, kabonero akalaga nti omusajja akyamwagala era simwetegefu kumusuulawo.
Agamba wadde obufumbo bulimu okusoomozebwa, tewali muntu yenna ayinza kwawula bantu nga bali mukwano okuggyako ng’omukyala oba omusajja abikooye.
