Kkooti ejjulirwamu, ekakasizza emyaka 14 egyaweebwa Godfrey Wamala amanyikiddwa nga Troy ku misango gy’okutta mu butanwa Moses Nakintije Ssekibogo eyali amanyikiddwa nga Mowzey Radio mu 2018.
Mu October, 2019, omulamuzi wa kkooti enkulu Jane Frances Abodo, yasiba Troy emyaka 14.
Wabula Troy, yaddukira mu kkooti ejulirwamu ng’awakanya ekibonerezo eky’emyaka 14 ekyamuweebwa omulamuzi Abodo n’emisango gye bamusiingisa.
Mu kkooti, yategeeza nti omulamuzi, yalemwa okwekeneenya obulungi obujjulizi obwaleetebwa ne bamusiba ebbanga eddene.
Omulamuzi Abodo bwe yali awa ensala ye nga 31, October, 2019, yasiba Troy emyaka 14, kyokka yasalako ebbanga lye yali amaze ku limanda ne bamusiba e Luzira, emyaka 12, emyezi 3 n’ennaku 4.
Wabula abalamuzi bonna 3 aba kkooti ejjulirwamu okuli Christopher Gashirabake, Dr. Asa Mugenyi ne John Mike Musisi bonna bagobye okusaba kwa Troy.
Bagamba nti, abajjulizi bonna okuli omukyala Pamela Musimire ne David Otim amanyikiddwa nga Washington, bonna baakakasa nti Troy, yeyali omutemu eyakuba omugenzi.
Mowzey Radio eyali owa Goodlyfe, yafuna obuzibu ku mutwe nga baamukubira mu De Bar Entebbe nga 22, January, 2018, nafiira ku Case Clinic mu Kampala nga 1, February, 2018 ku myaka 33 – https://www.youtube.com/watch?v=F8LPleFqdJg&t=318s
Ekifaananyi kya Daily Monitor
