Poliisi mu ggwanga erya Kenya, eri kusamba nsiko okunoonya omulenzi, omuyizi ku Yunivasite ku misango gy’okutta muganzi we, omulambo nagutematema ebitundu eby’enjawulo.
Mark Njoroge Wanjiru myaka 20 nga muyizi ku Kibabii University yanoonyezebwa.
Kigambibwa yasse muganzi we oluvanyuma lw’okukyalira jjajjaawe Sebastian Njoroge Mwangi myaka 70 omutuuze ku kyalo Molo, omulambo gye gusangiddwa.
Emikono gy’omuwala eyattiddwa, gisangiddwa ku kyalo Mtaa Saba era amangu ddala abatuuze baddukidde ku Poliisi ssaako n’abakulembeze ku kyalo.
Oluvanyuma lw’okunoonyereza, omulambo gw’omuwala, gusangiddwa nga bagusibidde mu nnyumba wansi w’emmeza nga guzingiddwa mu bulangiti era nga yatemeddwa ebintu ebyenjawulo ssaako n’ekivundu okusanikira ennyumba.
Alipoota ya Poliisi eraga nti omuwala abadde yatemeddwako emikono, omutwe, amagulu ebitundu by’ekyama era omutwe n’amagulu bikyanoonyezebwa.
Kigambibwa omuwala abadde mu gy’obukulu 18 ate omulenzi Wanjiru alira ku nsiko mu kiseera kino, abadde asoma Computer Science ku Yunivasite.
Abamu ku batuuze, bagamba nti omuwala sabiiti ewedde yekyangidde ku mulenzi nga kigambibwa kyavudde ku mulenzi okusangiddwa ng’aliko omuwala omulala gwe yabadde asaba akaboozi.
Omulenzi wadde yabadde agezaako okwetonda, omuwala yagaanye okusaba kwe era kiteeberezebwa y’emu ku nsonga lwaki yavudde mu mbeera okutuusa okumutta.
