Ababaka ba Palamenti, bakyalinze mu butongole, okubanjulira ebbago oba okubategeeza ku ntekateeka z’okuggyawo okulonda kw’omukulembeze w’eggwanga lino eri bannansi bonna, obuyinza okudda eri Palamenti, okusalawo alina okulembera eggwanga lino.
Okusinzira ku mawulire agali mu kutambula, Gavumenti eri mu kutekateeka okusindiika akakiiko akanoonyereza ku nnongoosereza mu ssemateek aka Contitutional Review Commission okwebuuza ku bantu ku nsonga ya Palamenti okulonda omukulembeze w’eggwanga lino.
Mu ntekateeka eyo, bannansi baakulonda ababaka ba Palamenti oluvanyuma ekibiina ekisinga ababaka abangi, balonde omukulembeze w’eggwanga nga bwe kiri mu ggwanga erya South Africa.
Okusinzira kw’amyuka ssaabawolereza wa gavumenti Jacson Kafuuzi, akakiiko ka Contitutional Review Commission, kalina okutabaala eggwanga lyonna, okunoonya ebiroowoza by’abantu ku nsonga eyo.
Wabula abakiise ba Palamenti, abasobodde okuwayamu naffe, bagamba nti ensonga z’okugyako bannansi omukisa omulonda Pulezidenti w’eggwanga, bikyali mu ngambo.
Bano okuli omubaka omukyala ow’e Buhweju Oliver Katwesigye, Mwine Mpaka ow’e Mbarara City South ne Ritah Atukwasa omubaka omukyala ow’e Mbarara City, bagamba nti ensonga zonna zirina kugwera mu Palamenti kyokka mu kiseera kino, ensonga za Palamenti okulonda Pulezidenti, ziri mu ngambo.
Akulira oludda oluwabula gavumenti mu palamenti, Mathias Mpuuga omubaka wa Nyendo- Mukungwe, agamba nti ekikolebwa kigendereddwamu okukuumira Pulezidenti Yoweri Kaguta Museveni mu ntebe.
Mpuuga agamba nti balinze ensonga bagireete mu Palamenti, okugisimbira ekkuuli.
Ate Pulezidenti w’ekibiina ki National Unity Platform (NUP) Robert Kyagulanyi Ssentamu (Bobi Wine) asobodde okweyambisa omukutu ogwa ‘Twitter’, okuvaayo ku nsonga eyo.
Bobi Wine agamba nti Pulezidenti Museveni okuwangulwa mu kulonda okuwedde, kati alemeddeko okutwala eddembe ly’abantu okulonda Pulezidenti waabwe. Agamba nti Pulaani egendereddwamu okuleeta mutabani we omutamiivu kuba singa bagenda mu kalulu, tasobola kufuna wadde ebitundu 5 ku 100, “Museveni having been roundly defeated in the last election, now wants to take away the right of the people of Uganda to elect their President. Of course he plans to do this in order to impose his drunk son on us, well knowing that he can’t even get 5% of a popular vote“.
