Abantu 15 basindikiddwa ku limanda mu kkomera e Luzira ku misango gy’okutta abasirikale, okulya mu nsi yabwe olukwe n’okunyaga emmundu mu disitulikiti y’e Mityana ne Kiboga.
Bano okuli Stuart Lugendo Savio Paul amanyikiddwa nga Kuffa Teeka, Julius Mulinda (Julio), Muhammad Nyanzi Makumgi nga naye amanyikiddwa nga Engineer, Kizito nga yeeyita Commander Muto, Godfrey Agodri (Walker Ramathan) ne Paul Iyamuremye.
Abalala kuliko Alex Bogere, Bob Robert Ssenyonga, John Masembe (Nasifu), Faizo Miti, Hakim Ssenyonjo, Sylivesta Matovu , Derick Kawuma, Tonny Ssekayombya ne Sam Sengonzi Lwanga.
Bagiddwa mu bitundu okuli Mityana, Kasanda, Wakiso ne Kampala era basimbiddwa mu maaso g’abalamuzi musanvu (7) mu kkooti y’amaggye e Makindye, ebadde ekubirizibwa ssentebe waayo Lt General Andrew Gutti.
Okusinzira ku ludda oluwaabi, emisango baagiza wakati wa November ne December, 2021, omuli okutta abasirikale Corporal Alfred Okech ne Police Constable Moses Kigongo, ku kyalo Ssebobo e Mityana, okutwala emmundu ekika kya AK-47, amasasi 30 nga 7, December, 2021.
Mungeri y’emu abakwate ne banaabwe abakyaliira ku nsiko, ku lunnaku lwe lumu benyigira mu kutta Special Police Constable Francis Ddimba ku Poliisi y’e Nakasozi ku kyalo Nakasengere mu disitulikiti y’e Kiboga ate nga 16, December, 2021 baalumba Poliisi y’e Nakasozi ne batta Corporal Francis Nsubuga.
Mu kkooti, begaanye emisango gyonna era oludda oluwaabi nga lukulembeddwamu Lt Gift Mubehamwe lutegeezeza kkooti nti bakyanoonyereza.
Lt General Gutti, ayongezaayo omusango okutuusa nga 24, January, 2022.
Abakwate baakwatibwa ebitongole byokwerinda mu December, 2021.
Fred Enanga, omwogezi wa Poliisi mu ggwanga agamba nti abakwate basibuka mu kabinja k’abayekera aka Uganda National Coalition for Change (UNCC).
