Abakulu okuva mu kibiina ky’obwanakyewa ekinoonyereza ku miwendo gy’ebintu ekya Gateway Research Centre, bakiguddeko, abakulu ku kakiiko ka Palamenti akalondoola ebyenfuna, bakedde kubatabukira nga bali mu kakiiko kaabwe ku nsonga z’ebitongole ebyenjawulo okuli eky’amasanyalaze (UMEME), kazambi n’amazzi (National Water and Sewerage Corporation) ne Kampuni z’amassimu, ku nsonga y’okunyunyuunta bannayuganda n’okubanyigiriza.
Aba Gateway Research Centre bagamba nti bakooye kkampuni ezo, okuwanika ensimbi nga basaba Palamenti eyingire mu nsonga ezo, ssente okendezebwa ebitundu 50 ku 100.
Mu kakiiko, akabadde kakubirizibwa, omubaka we Kiboga East, munna NRM Keefa Kiwanuka, aba Gateway Research Centre, bagamba nti kyewunyisa, Uganda okutunda amasanyalaze mu nsi z’ebweru, nga bangi ku bannayuganda bakyalemeddwa ogetusaako olw’ebbeeyi yaago.
Mungeri y’emu banokoddeyo ebbeeyi y’amazzi esukkiridde, omusolo ku Yinantenti, ekiremesa abavubuka bangi, okubaako kye bakola.
Wadde basobodde okulambika ensonga zaabwe, bagobeddwa mu kakiiko nga balemeddwa okuleeta obujjulizi ku nsonga zonna, okusinga okulumba Kampuni ezo nga bali mu kuteebereza ssaako n’engambo.
Wabula akulira Gateway Research Centre, Susan Nanozi, agamba nti wadde bagobeddwa, akakiiko kabakkiriza okudda okwanja ensonga zaabwe, omwezi ogujja ogw’okubiri, okutaasa bannayuganda.
Ate akulira ebya Tekinologiya mu Gateway Research Centre Kayemba Joseph agamba nti omusolo ku mazzi ogusukkiridde, y’emu ku nsonga lwaki abantu bangi, balemeddeko okunywa amazzi g’ebidiba.
Ate entiisa ebuutikidde abasuubuzi mu Katale k’e Nakasero mu Kampala, omutembeyi Elizabeth Kakayi myaka 60 bw’akutuse naafa omulundi gumu.
Kakayi, afudde ku ssaawa 5 n’eddakika 20 ez’okumakya ga leero, ekirese abasuubuzi nga bali maziga.
Okusinzira ku batembeyi, Kakayi abadde ne banne nga banyumya era agudde wansi omulundi gumu, okumwekebejja ng’amaze okufa.
Amangu ddala Poliisi eyitiddwa era omulambo gutwaliddwa mu ddwaaliro ekkulu e Mulago okwekebejjebwa.
Luke Owoyesigyire, amyuka omwogezi wa Poliisi mu Kampala n’emirirwano agamba nti Poliisi ku CPS etandiise okunoonyereza okuzuula ekivuddeko Kakayi okufa.
Abamu ku basuubuzi bagamba nti embeera mbi omuli okunoonya ssente nga balwadde, eyinza okuba emu ku nsonga lwaki Kakayi afudde kuba abadde mukyala mukozi nnyo.
