Omulamuzi wa kkooti ku Bugand Road ayongezaayo okutuusa nga 24, omwezi ogujja Ogw’okubiri, 2022, okuddamu okuwuliriza omusango oguvunaanibwa omubaka we Kawempe North Muhammad Ssegirinya amanyikiddwa nga Mr. Update, egy’okukuma omuliro mu bantu.
Kigambibwa, Ssegirinya wakati w’omwezi Ogwomunaana n’Ogwomwenda, 2020 mu Kampala, yasobola okweyambisa omukutu ogwa Face Book mu mannya ga ‘Ssegirinya Muhammad FANS PAGE’, okukuunga abantu okwenyigira mu kwekalakaasa n’okukola effujjo ku kabinja k’abantu ku nsonga za Robert Kyagulanyi Ssentamu amanyikiddwa nga Bobi Wine.
Mungeri y’emu Mr. Update mbu yategeeza nti singa bagezaako okutta Robert Kyagulanyi Ssentamu mu ngeri yonna, ekinabaawo, kigenda kubisaamu emirundi 40 kwebyo ebyaali mu ggwanga erya Rwanda mu kitta bantu kya 1994.
Wabula enkya ya leero, omulamuzi Owomugisha Siena eyazze mu bigere by’omulamuzi Doreen Karungi, ayongezaayo omusango nga kivudde ku ludda oluwaabi nga lukulembeddwamu omuwaabi omukulu Peter Mugisha obutabaawo.
Keko Joan, abaddewo ku lwa Peter Mugisha, asabye omulamuzi okwongezaayo omusango era amangu ddala omulamuzi akkiriza okusaba kwe.
Oluvudde mu kkooti, omubaka omukyala owa Kampala munnamateeka wa Ssegirinya, Shamim Malende ayogeddeko n’omusasi waffe era agambye nti omusango gubadde gulina okutandiika enkya ya leero okuwulirwa n’okuleeta mu kkooti abajjulizi.
Malende agamba nti wadde omulamuzi yakyusiddwa okuva ku Karungi okudda ku Owomugisha, balina essuubi nti Ssegirinya alina okufuna obwenkanya mu kkooti.
Mungeri y’emu maama wa Ssegirinya, Justine Nakajumba, awanjagidde abakulembeze bonna mu ggwanga okuvaayo okutaasa omwana we.
Maama alemeddeko nti mutabani we yali muntu w’abantu nga tasobola kwenyigira mu kutta muntu yenna.
Ssegirinya ali mu kkomera e Kigo ku misango egy’enjawulo omuli n’ekitta bantu ekyali e Masaka wakati w’omwezi Ogwomusanvu n’Ogwomunaana, 2021, ekyaleka abantu abasukka 20 nga battiddwa.
Ebirala ebifa mu ggwanga – https://www.youtube.com/watch?v=h0nlmO5jOHQ&t=370s
