Entiisa ebuutikidde abatuuze mu Katawuni k’e Kasenge, e Nsangi mu disitulikiti y’e Wakiso, amasannyalaze wegasse abantu basatu (3) ku ssaawa ng’emu (1), ey’okumakya ga leero.
Abattiddwa kuliko Asimmwe Babirye myaka 35, muganda we ategerekeseeko erya Annet myaka 24 n’omwana omulenzi Jeremiah Sekalenzi, myaka 5.
Okusinzira ku batuuze, abafudde baludde nga benyigira mu kubba amasannyalaze okuteeka mu kazigo kaabwe okuva ku neyiba, nga buli kiro balina okwaka.
Wabula enkya ya leero, Annet akedde kwoza ngoye kyokka bw’agenze okuzaanika, nga kuliko waaya emu kwezo, zebeyambisa okubba amasannyalaze, eyakutte ku waya y’engoye.
Annet akubye enduulu era amangu ddala mukulu we Asimmwe avuddeyo okutaasa kyokka ekyembi, amukuteko n’engalo naye ne gamukuba.
Asimwe, naye akubye enduulu era mutabani we Sekalenzi ku myaka 5 naye avuddeyo okutaasa era engalo zituukidde ku nnyina, naye ne gamukuba okutuusa lw’afudde.
Abatuuze webatuukidde okutaasa nga bonna basatu (3), kaweddemu z’embuyaga ezikunta ne baggyako, amasanyalaze era amangu ddala Poliisi y’e Nsangi eyitiddwa.
Wakati mu batuuze okulukusa amaziga ku kigudde ku kitundu kyabwe, emirambo gitwaliddwa mu ddwaaliro ekkulu e Mulago okwongera okwekebejjebwa.
Wabula Luke Owoyesigyire, amyuka omwogezi wa Poliisi mu Kampala n’emirirwano, agamba nti okunoonyereza ku kivuddeko embeera yonna kutandikiddewo.
Mungeri y’emu Owoyesigyire agamba nti ebikwekweeto ku bantu bonna abenyigidde mu kubba amasannyalaze, bigenda kuddamu, bonna bakwatibwe.
Ebirala ebifa mu ggwanga – https://www.youtube.com/watch?v=5BwY0rhJ6RY
