Essanyu libugaanya bannamateeka ssaako n’abawagizi ba Dr. Col Kizza Besigye, omulamuzi wa kkooti esookerwako e Nakawa Christine Nantege, bw’akedde okuwa ensala ye, nga bagiwangudde.
Besigye ali ku misango gy’okulya mu nsi olukwe n’okumanya ku misango egyo ne basirika ng’ali ne Hajji Obeid Lutale, ssaako munnamaggye Capt Dennis Oola, era baasindikibwa mu kkooti enkulu mu Kampala nga 29, May, 2025 okulinda okwewozaako.
Wabula wadde baali basindikiddwa mu kkooti enkulu, oludda oluwaabi nga lukulembeddwamu Richard Birivumbuka, basaba dda kkooti okubakkiriza okwekebejja essimu za Besigye, okubayambako mu ngeri y’okungaanya obujjulizi.
Wabula bannamateeka ba Besigye nga bakulembeddwamu omuloodi Ssalongo Erias Lukwago, n’abo ne basaba omulamuzi Nantege, ave misango gya Besigye nga kimenya amateeka, okuddamu okuyita omuntu yenna mu kkooti ento, aba asindikiddwa mu kkooti enkulu okwewozaako.
Wabula mu kkooti e Nakawa enkya ya leero, omulamuzi Nantege, bw’abadde awa ensala ye, agambye nti kkooti y’e Nakawa, tekyalina buyinza okuddamu okuyita Besigye ne banne mu kkooti yaabwe, wadde okulagira ekintu kyonna.
Ensala y’omulamuzi Nantege, ekyamudde abawagizi ba Besigye ne bannamateeka, era basekeredde Gavumenti ebadde esuubira okweyambisa amassimu ga Besigye okunoonya Besigye.
Bano, bagamba nti Gavumenti okugaana okuyimbula Besigye ne banne nga bakulungudde emyezi 6 ku limanda e Luzira ne basindikibwa mu kkooti enkulu nga tebannaba kufundikira kunoonyereza, kati kibalidde kuba mu kkooti enkulu, tebalina bujjulizi.
Munnamateeka Lukwago agamba nti teri kuzikiza okutuusa nga Besigye ne Lutale bayimbuddwa n’okugibwako emisango – https://www.youtube.com/watch?v=eT1X9bTTH6A&t=24s
