Omuyimbi Eddy Kenzo avuddeyo ku nsonga z’omubaka we Kyadondo East mu Palamenti Robert Kyagulanyi Ssentamu (Bobi Wine), eyasindikiddwa ku limanda mu kkomera e Luzira okutuusa nga 2, April, 2019.
Bobi Wine yasimbiddwa mu maaso g’omulamuzi wa kkooti ya Buganda Road era okusinzira ku ludda oluwaabi Bobi Wine, muganda we Fred Nyanzi Ssentamu, David Lule, Edward Sebufu n’abalala abakyalira ku nsiko, nga 11, July, 2018 wakati mu Kampala ku City Square , bakuba olukungana mu ngeri emenya amateeka n’ekigendererwa eky’okunga bannansi okugyemera okuwa omusolo ogwa Mobile Money, ekintu ekimenya amateeka nga ne Poliisi tebagitegezezaako.
Ku lunnaku olwo, kigambibwa Bobi yalemererwa okukolagana ne poliisi okukakkasa nti abantu abaali mu lukungaana lwe tebalina bissi kyokka omusango yagwegaanye mu maaso g’omulamuzi Esther Nahirya.
Mu mbeera eyo, Kenzo asobodde okweyambisa omukutu ogwa Instagram okusaba Gavumenti okuyimbula Bobi Wine mu bwangu era y’omu ku bayimbi abatandisewo kampeyini eya “#freebobiwine”.
