Poliisi ekutte omutabani Mujurizi Rodgers myaka 27 ku by’okutuga nnyina Twesigomwe Rose myaka 60 namutirawo ku kyalo Muhororo mu ggombolola y’e Ndolero ward mu disitulikiti y’e Rukungiri.
Okusinzira ku Poliisi, Mujurizi abadde alina obulwadde bw’omutwe era aba famire babadde muntekateeka okumutwala mu ddwaaliro lya Kisizi Hospital okumwekebejja ekikyamu ekimuliko.
Aba famire bagamba nti olunnaku olw’eggulo ku Lwomukaaga ku ssaawa 10 ez’olw’eggulo, Mujurizi yayingidde ekisenge mwe yasangiriza nnyabwe, namutuga okukkakkana ng’amusse.
Kigambibwa Mujurizi abadde agezaako okukaka nnyina akaboozi kuba alina ekikyamu ku mutwe, kyokka n’amutta.
Elly Maate omwogezi wa Poliisi mu bitundu bye Kigezi agambye nti Mujurizi akwattiddwa Poliisi okubayambako mu kunoonyereza.
Mungeri y’emu agambye nti Mujurizi atwaliddwa mu ddwaaliro okumwekebejja obwongo oba bukola bulungi.
