100.2 Galaxy FM, ezzeemu okuteeka ssente mu bannakatemba Madrat ne Chiko mu kivvulu kyabwe eky’omulundi ogw’okusatu (3) ekya “Nseko Buseko season three”, ekitwaliddwa ku UMA multi purpose hall ku UMA show grounds, Jinja road, Kampala.
Ekivvulu kyakubaayo nga 2, August, 2019 era ku mulundi gunno, bawerekeddwako bannakatemba abalala n’abayimbi era Galaxy FM ekitaddemu obukadde 12.
Madrat ne Chiko wakati mu ssanyu, balaze okusiima kwabwe eri Galaxy FM okulemberamu laadiyo zonna mu ggwanga okutumbula talenti era kisobodde okuyamba okulwanyisa ebbula ly’emirimu.
Chiko agamba nti ku mulundi gunno, balina ekipya kye bagenda okulaga ensi omuli okusabukulula bannakatemba abapya mu kisaawe kya Katemba.
Ate Manejja wa 100.2 Galaxy FM Ashraf Ajobe Habib, agambye nti okuwagira ebitone n’okweyisa obulungi eri abantu y’emu ku nsonga lwaki Madrat ne Chiko bateekeddwamu obukadde 12 mu kivvulu kyabwe.
Galaxy Fm ewagidde Madrat ne Chiko mu bivvulu byonna ebya Nseko Buseko okuva mu 2017.
