Palamenti ya Uganda eyisizza bajeti y’omwaka gw’ebyensimbi ogwa 2019 – 2020 ya Tuliliyooni 40.
Ku ssente ezo, ebitundu 25 ku 100 zigenda kuva mu bagabi b’obuyambi n’amawanga g’ebweru ate 75 ku 100 zigenda kuva ku musolo ogukunganyizibwa wano mu ggwanga era bajeti yakusomebwa nga 13, June, 2019.
Okusinzira ku bajeti eyayisiddwa eby’entambula n’emirimu byebisinze okufuna ssente nga biweereddwa Tuliliyooni 6.4 okuva ku 4.7 mu bajeti ya 2018 – 2019, ebyokwerinda Tuliliyooni 3.6 okuva ku 2.06 mu bajeti ya 2018 – 2019, ebyenjigiriza 3.2 okuva ku 2.7 mu bajeti ya 2018 – 2019.
Ate eby’obugagga by’omu ttaka Tuliliyooni 2.9, ebyobulamu Tuliliyooni 2.5, eby’amateeka Tuliliyooni 1.6, Gavumenti z’ebitundu Tuliliyooni 1.2, amazzi n’obutonde Tuliliyooni 1.04, eby’obulimi Tuliliyooni 1.01.
Era mu bajeti, eby’obulambuzi biweereddwa biriyoni 157, bya tekinologye (ICT) biriyoni 123, eby’obusuubuzi n’amakolero biriyoni 171, ettaka n’amayumba biriyoni 193 n’ebintu ebirala.
Minisita w’ebyensimbi Matia Kasaija agenda kusomera bannayuganda bajeti nga 13, June, 2019 ku Serena Hotel mu Kampala.
