Ekitongole ekya Flying squad ekya Poliisi kikutte abantu musanvu (7) abagambibwa okwenyigira mu kubba bodaboda mu bitundu bye Masaka.
Abakwattiddwa kuliko Yuda Kekisibo, 19, nga mutuuze we Mukudde, Shafik Katongole, 24 nga mutuuze mu katawuni k’e Kyengera mu disitulikiti y’e Wakiso, Timothy Musaazi myaka 25 okuva ku kyalo Kyangwe mu disitulikiti y’e Lwengo.
Abalala kuliko Hussein Kawuku 22, nga mutuuze we Kasana mu ggombolola y’e Nyendo Ssenyange, ssaako n’abalala basatu (3) abatamanyiddwaako bibakwatako.
Okusinzira ku mwogezi wa Poliisi mu bendobendo ly’e Masaka Paul Kangave, abakwatte basobodde okubalondoola okumala akaseera akawerako okutuusa lwe bakwattiddwa.
Mungeri y’emu agambye nti mu bbanga lye myezi 4 gyokka, aba bodaboda bataano (5) battiddwa mu bendobendo ly’e Masaka nga waliwo n’abanyiga ebiwundu.
