Omulamuzi wa kkooti ku City Hall mu Kampala Valerian Tuhimbise aliko omusajja gw’asindise e Luzira , okusibwa emyaka 3 lwa kubba eddagala ly’engatto mu Super Markert.
Edson Mumbere myaka 36, yasindikiddwa mu kkomera era okusinzira ku ludda oluwaabi nga 20, omwezi oguwedde ogwomunaana, Mumbere yabba emikebe 8 egy’eddagala ly’engatto mu Capital Shoppers Super Market ettabi ery’e Ntinda nga gibalibwamu shs 87000.
Mu kkooti, Mumbere akirizza omusango olwa kkamera ezaamukwata ebifaananyi ng’abba, naasaba omulamuzi ekibonerezo ekisamusaamu.
Wabula omulamuzi Tuhimbise agambye nti Mumbere abadde agufudde mulimu okubba mu SuperMarket era webaamukwatira ng’ali ku kibonerezo kya bulungi bwa nsi, ekyamuweebwa kkooti y’emu lwa kubba mu SuperMarket.
Omulamuzi amukalize emyaka 3 okuba eky’okulabirako ku bantu abegumbulidde okubba mu Super Market n’okutangira abalala abalina ekirowoozo okwenyigira mu kikolwa kye kimu.
