Kyaddaki okuwuliriza omusango gwa Godfrey Wamala amanyikiddwa nga Troy ali ku misango gy’okutta eyali omuyimbi nakinku Moses Ssekibogo amanyikiddwa nga Mowzey Radio kutandiise enkya ya leero mu maaso g’omulamuzi wa kkooti enkulu etudde Entebbe Jane Francis Abodo.
Mowzey Radio yafa nga 1, Ogwokubiri, 2018 ku Case Hospital mu Kampala oluvanyuma lw’okukubwa mu bbaala ya De Bar ku luguudo lwe Ntebbe mu disitulikiti y’e Wakiso.
Enkya ya leero David Ebanget amanyikiddwa nga Polodyusa Washington yasoose mu kagguli ka kkooti, ng’omujjulizi wa Gavumenti asoose, okulumiriza Wamala ku by’okutta Radio.
Washington wakati mu kuyongobera agambye nti Wamala ye musajja gwajjukira okutta mukwano gwe Radio era abadde amujjukira bulungi mu ffeesi ye nga n’erinnya, amujjukira nga Troy.
Mungeri y’emu agambye nti Radio yali mukwano gwe nnyo emyaka egisukka mu 10 era ebigambo bye, bireese ekiyongobero mu kkooti.
Radio yakubwa nga 22, Janwali, 2018, Troy nakwatibwa nga 4, ogwokubiri, 2018 oluvanyuma lwa Radio okufa era yaziikibwa nga 3, Ogwokubiri era 2018 e Kagga, Nakawuka.
