Poliisi etandise okunoonyereza ku bantu babiri (2) abakubiddwa amasasi agabattiddewo ku luguudo lwa Ntebbe Expressway, ekkiro ekikeseza olunaku lwa leero.
Abattiddwa kuliko omukyala n’omukuumi we, ng’ettemu libadde ku lutindo lwa Nambigirwa ku Ntebbe Expressway nga basemberedde okutuuka ku kyalo Mpala mu tawuni kanso y’e Katabi.
Kitegerekese nti abattiddwa kuliko Maya Florence Kamukazi nga munnansi wa Rwanda n’omukuumi we Ruhegyera Ntereho Joshua, nga babadde mu mmotoka yabwe ekika kya Toyota Land Cruiser namba UAW 534B.
Emirambo gisangiddwa mu kitaba ky’omusaayi era okusinzira kw’amyuka omwogezi wa Poliisi mu Kampala n’emirirwano Luke Oweyesigyire, okunoonyereza ku ttemu, kutandikiddewo mbagirawo.
Princess Kamikazi n’omukuumi Ruhegyera babadde batuuze b’e Katabi Mpala mu disitulikiti y’e Wakiso era kigambibwa battiddwa nga zikunukiriza okuwera ssaawa 6 n’ekitundu ez’ekkiro.
