Poliisi y’e Lyantonde etandiise okunoonyereza abatemu abasse abantu basatu (3) nga bonna baakubiddwa amasasi agaabatiddewo ku ssaawa 8 ez’ekkiro ekikeseza olunaku lwa leero
Abattiddwa kuliko ssemaka Justus Ssendege myaka 27, mukyala we Kyampire Evelyn Naleba 24 ssaako ne muganda w’omusajja Robert Mubiru 40 ku kyalo Nakasozi mu ggombolola y’e Kinuka mu disitulikiti y’e Lyantonde.
Okusinzira ku mwogezi wa Poliisi mu bendobendo ly’e Masaka, Paul Kangave, Ssendege abadde alina ennyumba okuli n’edduuka era abatemu babasanze balaba Ttiivi okubatta era emirambo gisangiddwa mu kitaba kya musaayi.
Kangave era agambye nti Poliisi esobodde okuzuula ebisosonkole by’amasasi bisatu (3) mu kifo awasangiddwa omulambo era kiteeberezebwa abatemu bakozeseza emmundu ekika kya AK47 kyokka tewali kintu kyonna kyatwaliddwa.
Mungeri y’emu abantu 2 battiddwa ekkiro ekikeseza olunaku lwa leero ku luguudo lwa Ntebbe Express Highway nga bonna bakubiddwa amasasi.
Abattiddwa kuliko Ruhegyera Joshua Nteireho n’omukyala Maya Florence Kamukazi nga bonna babadde mu mmotoka ekika kya Toyota Land Cruiser namba UAW 534B.
