Bbaasi okuva mu Kampuni ya ‘Robyln Coaches’ egudde ku kabenje mu Disitulikiti y’e Nakasongola ku luguudo oluva e Kampala okudda e Gulu era abantu 7 bafiiriddewo ate 9 bali mu mbeera mbi.
Abamu ku bafudde kuliko Mathew Stanley Ochora omusomesa ku Jinja College S.S, Johnson Akena okuva e Kitgum, Stella Namono okuva e Mukono ne Susan Akello.
Ate abafunye ebisago abali mu mbeera mbi kuliko Wilfred Oyilot (Packwach), Christine Komugisha (Kayunga), Solomon Obalim (Agago), Lameck Okello (Kitgum), Gift Tumusiime (Hoima) n’omudduumizi wa Poliisi mu Disitulikiti y’e Lamwo Moses Elaiu.
Akabenje kagudde ku kyalo Namayonjo mu katawuni k’e Wabigalo mu Disitulikiti y’e Nakasongola ku ssaawa 7 ez’ekkiro.
Ssentebbe w’ekyalo Namayonjo, Patrick Lugonvu agambye nti ddereeva wa Robyln Coaches namba UAQ 643W ayingiridde emmotoka ekika kya tippa namba UAH 001Y, ekivuddeko abantu okufa.
Abafunye ebisago bali ku ndiri mu ddwaaliro lye Nakasongola Health center IV ne Nakasongola Army Hospital.
Emirambo egimu gitwaliddwa mu ggwanika ly’eddwaaliro lye Nakasongola Health center IV.
Moses Elaiu Osega, adduumira Poliisi mu Disitulikiti y’e Lamwo agambye nti Poliisi etandiise okunoonyereza ekivuddeko akabenje.
