Abasajja 4 abagambibwa okutta omuwala Maria Nagirinya ne Ronald Kitayimbwa basindikiddwa ku Limanda mu kkomera e Luzira, okutuusa nga 27, Omwezi gunno, ogwomwenda.
Banno okuli Kasolo Coporiyamu eyeeyita Arsenal, Lubega Johnson ono yeeyita Etoo, Nasif Kalyango ne Hassan Kisekka amanyikiddwa nga Massada, basimbiddwa mu maaso g’omulamuzi Joel Wegoye owa Mwanga Two.
Mu kkooti, baguddwako emisango 4 omuli okuwamba n’ekigendererwa eky’okutemula, Nagirinya ne Kitayimbwa, ogw’obubbi nga benyigira mu kutwala emmotoka ya Nagirinya ekika kya Spacio namba UBA 570V, essimu ye ng’eriko ssente emitwalo 26, essimu ya Kitayimbwa ssaako n’essente ezaaliko 24,000 n’emisango emirala.
Okusinzira ku ludda oluwaabi, bano ne banaabwe abakyalira ku nsiko nga 28, omwezi oguwedde ogwomunaana, bawaamba Nagirinya ne munne okuva Lungujja era emirambo gyabwe gyazuulibwa nga wayise ennaku bbiri (2) mu lutobazi e Nama mu disitulikiti y’e Mukono.
Aba 4 tebakiriziddwa kubaako kye boogera mu kkooti kuba emisango gyabwe gyanagomola, egiteekeddwa okuwulirwa kkooti enkulu yokka.
Banno basindikiddwa ku Limanda, okuwa obudde oludda oluwaabi okomekereza okunoonyereza.
