Poliisi y’e Najjera ekutte omusajja ku by’okubba ebintu by’omutuuze James Nakisa era yasangiddwa ku ssaawa 6 n’ekitundu ez’emisana olunnaku olw’eggulo ku Lwokusatu ng’aleese emmotoka okubiteekako.
Okusinzira ku ssentebbe w’ekyalo Bulabira, Med Nsubuga, omukwate Yasin Kayiza yasangiddwa ku kyalo Bulabira Kamwanyi ng’amaze okumenya oluggi, afulumizza ebintu okuli firiigi, Ttiivi, Laadiyo, emizindalo n’ebintu ebirala.
Amangu ddala abatuuze bakubye enduulu era Kayiza bamusaanze aleese emmotoka ekika kya Toyota Wish, namba UAZ 174Z okubiteekako kyokka banne bonna badduse.
Kayiza ali ku Poliisi y’e Najjera ku misango gy’okumenya enju n’okubba era essaawa yonna bamutwala mu kkooti.
Abatuuze b’e Najjera bagamba nti ebikolwa eby’okumenya enju ne batwala ebintu byabwe, byeyongedde era bawanjagidde ekitongole ekya Poliisi okwongera amaanyi mu kunyweza ebyokwerinda n’okulawuna ebitundu byonna obudde bw’ekkiro.
