Entiisa ebutikidde abatuuze ku kyalo Nyansooro A cell mu tawuni kanso y’e Mabaale mu disitulikiti y’e Kagadi, ssemaka Fred Happy myaka 43 bw’attiddwa mu ngeri eyongedde okutya mu batuuze.
Omulambo gwa Happy, gusangiddwa ku luguudo oluva e Mabaale okudda e Burora mu kitaba ky’omusaayi nga yasaliddwa ebiso ku mutwe, ensingo, olubuto n’ekyenyi.
Okusinzira ku ssentebbe w’ekyalo William Magara, mu bbanga lya sabiti 3, abantu babiri (2) battiddwa mu kifo kye kimu, omulambo gwa Happy wegusangiddwa.
Abasirikale okuva ku kitebe kya Poliisi e Kagadi bayitiddwa era baleese embwa ekoonga olusu kyokka tewali muntu yenna akwattiddwa.
Omulambo gutwaliddwa Poliisi okwongera okwekebejjebwa.
