Entiisa ebutikidde abayizi n’abasomesa ku ssomero Bukari Primary School mu ggombolola y’e Bukibokolo mu disitulikiti y’e Bududa, omu ku bayizi bw’agudde wansi nafiirawo wakati mu kigezo ky’okubala.
Winnie Kakayi, myaka 14 y’omu ku bayizi 21 abewandiisa okutuula ebigezo by’ekibiina eky’omusanvu ku ssomero eryo, ebitandiise enkya ya leero.
Okusinzira ku David Kitutu omukulu w’essomero, abazadde b’omwana, bakedde kumutegeeza nti omwana mulwadde omusujja gw’ensiri kyokka alina okutuula ebigezo okutaasa emisomo gye.
Kakayi abadde yakaweebwa ekigezo eky’okubala nga yakatandika, agudde wansi omulundi gumu nafiirawo.
Wabula John Wandera, taata w’omugenzi agambye nti agezezaako, okulemesa omwana ogenda ku ssomero kyokka omwana alemeddeko, bw’amutegezeza nti alina okutuula ebigezo byabadde yetegekera.
