Bya Nalule Aminah
Poliisi ekubye ttiyagaasi mu bakyala b’ekibiina kya Forum for Democratic Change (FDC) abakedde okwetekateeka okutwala ekiwandiiko kyabwe eri sipiika wa Palamenti Rebecca Alitwala Kadaga nga bawakanya ekya Poliisi okutulugunya abakulembeze ku ludda oluvuganya Gavumenti.
Abakyala abasukka 30 bakedde ku kungaanira ku kitebe kya FDC e Najjanakumbi ku luguudo lwe Entebbe okwetekateeka okutambula.
Anna Adeke akikirira abavubuka mu Palamenti agambye nti okwekalakasa kugendereddwamu okulaga obutali bumativu ku ngeri Poliisi gy’esukkiridde okutwalira amateeka mu ngalo omuli okwenyigira mu kutyoboola eddembe ly’abakulembeze ku ludda oluvuganya n’okulaga nti eggwanga lyonna abantu banyivu olw’ebikolwa bya Poliisi.
Wabula olubadde okufuluma ggeeti ku kitebe e Najjanankumbi, Poliisi ebalagidde okudda munda era wakati mu kuwanyisiganya ebigambo, abakyala 4 bakwattiddwa.
Ate abakyala abasigadde munda bakasukidde Poliisi amayinja ekiwaliriza abasirikale okubaanukuza ttiyagaasi.
Aba FDC bagamba nti Poliisi okubalemesa okuba olukungana mu kisaawe e Namboole ku ntandikwa ya sabiti eno n’okukuba eyali Pulezidenti w’ekibiina kyabwe Rtd Dr Kizza Besigye ttiyagaasi n’amazzi agabalagala, kabonero akalaga nti Poliisi eriwo kuwagira NRM, ekintu ekimenya amateeka.
Ku nsonga eyo, Pulezidenti wa FDC Patrick Oboi Amuriat atabukidde ekitongole ekya Poliisi okubalemesa okukola emirimu gy’ekibiina ate nga FDC kibiina ekimanyiddwa mu mateeka.
Mungeri y’emu Amuriat avumiridde ekikolwa kya Poliisi okukuba abakyala ttiyagaasi.
