Abavubuka ba National Resistance Movement (NRM) mu Kampala abegattira mu kibiina kya Youth Renewable Energy basuubiza okusala eddiiro okuwagira ekisinde ky’omubaka we Kyadondo East Robert Kyagulanyi Ssentamu (Bobi Wine) ekya People Power olwa NRM okubasuulirira.
Abavubuka abo nga bakulembeddwamu ssentebe waabwe Sebulime Emmanuel mu kwogera ku nsonga zaabwe mu Kampala, bagambye nti ekibiina kirimu abavubuka abasukka mu 120,000 mu Kampala ate nga bonna bawagizi ba NRM ne Pulezidenti Yoweri Kaguta Museveni kyokka bakooye okwejjusa lwaki bawagira NRM.
Sebulime agamba nti NRM esukkiridde okusuubiza eby’empewo omuli ebyokwerinda, ebyenfuna, Poliisi esukkiridde okubatulugunya kyokka abakulembeze mu kibiina, balemeddwa okuvaayo okubayamba mu bizibu byabwe.
Mungeri y’emu agambye nti bakooye embeera embi era kekaseera okuwagira Bobi Wine okusobola okweyagalira mu ggwanga lyabwe.
Wabula Keefa Mafumo amyuka akwasaganya ensonga z’abavubuka mu offiisi y’omukulembeze w’eggwanga abadde omugenyi omukulu, asabye abavubuka obutakyusa ndowooza zaabwe kuba NRM ye taata w’eggwanga ate Pulezidenti Museveni abadde tamanyi kiki kigenda mu maaso.
Mafumo asuubiza okubatwala eri Pulezidenti Museveni okwanja ensonga zaabwe kuba ekibiina kyabwe kirina bulungi abakulembeze ate kiteketeeke bulungi.
Mungeri y’emu agambye nti Pulezidenti alina entekateeka okuggya abantu bonna mu bwavu era y’emu ku nsonga lwaki yatandikawo pulogulamu ‘EMYOGA’ kigambo kya Lunyankole ekitegeeza pulojekiti ez’enjawulo okuyamba abantu.
Mafumo asabye abavubuka bonna okwekuumira mu NRM kuba ekisinde kya People Power tekirina mulamwa ate tebalina kye bagenda kufunayo.
