Poliisi y’e Kalisizo ekutte abasawo babiri (2) abazaalisa ku misango gy’obulagajjavu, ekivuddeko omukyala okufa abadde agenze mu ddwaaliro okuzaala.
Abasawo kuliko Betty Namubiru ne Faith Nakamatte nga bakwattiddwa Poliisi nga busasaana enkya ya leero.
Kigambibwa omukyala kati omugenzi Gaudencia Namata atuuse mu ddwaaliro ng’alumwa asemberedde okuzaala kyokka abasawo, bamusabye ssente shs 160,000 okumukwatako.
Namata abadde ava ku kyalo Buzilanduulu mu ggombolola y’e Kasasa mu disitulikiti y’e Kyotera, alemereddwa okuwaayo ssente era abasawo ne bagaana okumuzaalisa.
Akulukuse amaziga n’okulajjana okutuusa lw’afudde, ekitabudde abalwadde abasangiddwa ku ddwaaliro era batandikiddewo okwasa enziji, amadinisa ssaako n’obutebe era amangu ddala Poliisi eyitiddwa okutaasa embeera, abazaalisa ne bakwatibwa.
Akulira Poliisi y’e Kalisizo Innocent Tumwine agamba nti Poliisi, etandiise okunoonya akulira eddwaaliro Emmanuel Ssekyeru okwewozaako ku nsonga y’abakozi, abaviiriddeko omukyala okufa.
