Poliisi ekutte abantu basatu (3) ku by’okuttibwa kw’omwana Queen Alber Kainerugaba myaka 6 abadde ali mu Top Class ku Home Kindergarten School and Day Care ku kyalo Busibante Najeera mu Monisipaali y’e Kira mu disitulikiti y’e Wakiso.
Abakwate kuliko omusomesa, akulira abasomesa ssaako ne Diyirekita.
Kigambibwa omusomesa Juliet Nuwamany yakuba Kainerugaba emiggo nga 27, Febwali, 2020, natwalibwa mu ddwaaliro ekkulu e Mulago ng’ali mu mbeera mbi gye yafiiridde akawungeezi k’olunnaku olwa Mmande.
Alipoota y’abasawo egamba nti omwana yafudde olw’ebisago oluvanyuma lw’okukubwa n’okuvaamu omusaayi omungi.
Okusinzira ku mwogezi wa Poliisi mu Kampala n’emirirwano Patrick Onyango, abakwate bali ku Poliisi y’e Najjera ku misango gy’obutemu.
Onyango agamba nti bewunyiza akulira abasomesa, okuddukira ku Poliisi y’e Najjera nga yefuula agenda okutegeeza ku ky’omusomesa we okutimpula omwana emiggo nga wayise ennaku 19.
Ate omu ku bazadde omu ku balina abaana ku ssomero lya Home Kindergarten School and Day Care, agamba nti eky’abasomesa okutimpula abaana emiggo, eky’ongedde okuteekawo oluwoonko wakati w’abaana n’abasomesa.
Maama w’omugenzi Lewis Kainerugaba agamba nti eky’ obutagenda ku Poliisi ng’omwana we akubiddwa, yali agezaako kutaasa bulamu bwa mwana we kyokka mu kiseera kino anoonya bwenkanya oluvanyuma lw’omwana we okufa.
Eddoboozi lya Onyango
