Okulonda abakulembeze babayizi ku yunivasite e Kyambogo kuyimiriziddwa nga wasigadde ssaawa mbale abayizi okulonda abakulembeze baabwe.
Okusinzira ku kiwandiiko ekifulumiziddwa akulira abayizi Mildred Tibananuka, okulonda kwayimiriziddwa akawungeezi k’olunnaku olw’eggulo nga kivudde ku biragiro by’omukulembeze w’eggwanga, okuggala amasomero gonna mu ggwanga ssaako ne yunivasite.
Yoweri Museveni yayimirizza eby’omusomesa abayizi okumala omwezi mulamba ng’emu ku ngeri, y’okutangira ‘Coronavirus’ ayinza okuyingira eggwanga Uganda ssaako n’okusasaana.
Wabula Tibananuka agamba nti okulonda, kubadde kulina okubaawo olunnaku olwaleero wabula kwayimiriziddwa, okuteeka mu nkola ekiragiro ekyayisiddwa omukulembeze w’eggwanga ekya Yunivasite okuggalawo obutasukka lunnaku lwa nkya ku Lwokutaano mu ttuntu.
Abayizi, baali balina okulonda nga 10, Omwezi guno Ogwokusatu kyokka ne kwongezebwayo okutuusa nga 17, era Omwezi guno Ogwokusatu olw’okulwawo okukubisa obululu.
Wabula amyuka Chansala Professor Eli Katunguka naye nayongezaayo okulonda okutuusa olunnaku olwaleero nga 19, Ogwokusatu, 2020 olw’abayizi abesimbyewo okusindika ebifaananyi nga biteekeddwako obubonero ku buli kibiina omuntu kye yesimbiddemu oba ekisinde, ekintu ekitakirizibwa mu ssemateeka wa yunivasite.
