Gavumenti mu ggwanga erya Nigeria erangiridde nti omuwendo gw’abantu abalwadde ba Ssenyiga we China (Covid-19) asaasanyizibwa akawuka aka Coronavirus gweyongedde.
Okusinzira ku Minisitule y’ebyobulamu, abalwadde baweze 30 ng’olunnaku olw’eggulo, baazudde abantu 4 abalwadde.
Minisitule egamba nti abalwadde baavudde mu nsi ezirimu obulwadde nga bali mu kujanjabwa mu malwaliro ag’enjawulo.
Omuwendo gw’abalwadde, guwaliriza abasawo abaali bekalakasizza olw’obutafuna musaala okumala emyezi egiwera, okudda ku mirimu, okuyambako okusomesa abantu, okutangira obulwadde okweyongera.
Olunnaku olwaleero, Gavumenti eyimirizza eggaali z’omuka ezitambuza abantu ssaako n’ennyonyi nga kikoleddwa, okutangira ssenyiga okusasaana.
Abakozi ku mirimu egy’enjawulo balagiddwa okusigala awaka okumala ennaku 14 ssaako n’abakozi ba Gavumenti.
Abasawo b’ekinnansi basabiddwa okukomya okung’anya abantu kuba kiyinza okuvaako obulwadde okweyongera.
Omu ku bagagga abagundivu mu ggwanga eryo eyali yegwanyiza obukulembeze bw’eggwanga Atiku Abubakar agambye nti omu ku baana be azuuliddwa nga mulwadde era yaweereddwa ekitanda mu ddwaaliro mu kibuga Abuja.
