Munnamagye eyaganyuka eyeegwanyiza entebbe y’obwapulezidenti Lt Gen (rtd) Henry Tumukunde alabiseeko mu maaso g’omulamuzi wa kkooti ya Buganda Road munkola eya tekinologiya emanyiddwa nga ‘video conferencing’ era omusango gwe gwongezeddwayo okutuusa nga 14, Omwezi ogujja Ogwokuna.
Lt Gen Tumukunde ali ku limanda mu kkomera e Luzira ku misango gy’okulya mu nsi ye olukwe n’okusangibwa n’ebyokulwanyisa mu ngeri emenya amateeka.
Enkya ya leero, omulamuzi Miriam Akello Ayo ayongezaayo omusango gwe nga kivudde ku ludda oluwaabi, okumutegeeza nti bakyanoonyereza nga n’omulamuzi omukulu ali musango gwe Valerian Tuhimbise talabiseeko.
Omulamuzi Tuhimbise y’omu ku bali mu luwumula olwa Ssaabalamuzi, okuyimiriza entuula za kkooti ng’emu ku ngeri y’okutangira ‘Coronavirus’ okusasaana.
Okusinzira ku ludda oluwaabi, nga 13, omwezi guno Ogwokusatu, ku offisi ya Gen Tumukunde ku Impala Avenue e Kololo wasangibwayo emmundu 2 okuli Ak47 ne Pisito nga zonna tezirina layisinsi kyokka emisango gyonna yagyegaana omuli ne gy’okulya mu nsi ye olukwe.
