Ekitongole kya Poliisi kiguddemu ekyekaango, webafunye amawulire nti omu ku basirikale munaabwe afunye ekirwadde ki Covid-19 kisasaanyizibwa akawuka ka CoronaVirus.
Okusinzira ku nsonda ezesigika, omusirikale omulwadde ye Asp Mubarak Semakula akulira ebikwekweeto ku Poliisi y’e Wandegeya.
Kigambibwa Omusirikale Semakula yayitibwa sabiti ewedde okutereeza embeera ku ddwaaliro ekkulu e Mulago ku ‘Ward 2A’ kyokka bagenze okumwekebejja nga yafunye Ssennyiga we China Covid-19.
Semakula yakebeddwa akawungeezi k’olunnaku olweggulo ku Ssande era ali mu mikono gy’abasawo.
Patrick Onyango omwogezi wa Poliisi mu Kampala n’emirirwano ku nsonga ya Semakula okulwala agambye nti, “alizaati tezinafuluma nange nzirinda. Mu kiseera kino ali mu Kalantini e Ntebbe ng’omuntu omulala yenna singa asemberera omulwadde oba ng’ateeberezebwa okuba omulwadde‘.
Mu kiseera kino Uganda erina abalwadde 33 era mu nsi yonna bali 752,297 ate abaakafa bali 36,207.
