Omukyala Hadija Mudondo okuva mu ggombolola y’e Kabwangasi mu disitulikiti y’e Butebo azaalidde abalongo ku kkubo ku luguudo oluva Mbale-Soroti mu Monisipaali y’e Mbale akawungeezi ka leero.
Mudondo agamba nti olubuto lutandiise okumuluma kyokka alemereddwa okufuna emmotoka wadde bodaboda okumutambuza nga batya okubwa emiggo, abasirikale abali mu kuteeka mu nkola ebiragiro by’omukulembeze w’eggwanga Yoweri Kaguta Museveni mu kiseera kino eky’okulwanyisa ssennyiga omukambwe ‘Covid-19’.
Agamba nti atandiise okutambula okuva mu disitulikiti y’e Butebo okudda ku ddwaaliro e Mbale kyokka webatuuze ku kyalo Namakwekwe ng’ali ne muto we, ebisa byeyongedde okutuusa omu ku balongo lwavuddeyo ne badda w’ebbali w’ekkubo okuzaala.
Mudondo abadde yakamala okuzaala ‘Ambulensi’ okuva ku ddwaaliro Tobin General Clinic ebadde ku mirimu gyaayo, esobodde okumuyamba okumutwala mu Kiriniki ebadde okumpi okuyambibwa.
Farida Gimono omu ku baduukirize agambye nti omukyala azadde omwana asooka ng’akyali mu mpale y’omunda.
Mungeri y’emu Gimono asabye Pulezidenti Museveni okuyamba okukyusa ku bukwakulizo, okutaasa abakyala abali embuto.
