Poliisi mu Kampala etandiise okunoonyereza ku musajja eyakwattiddwa ng’avuga bodaboda, eyakubiddwa essasi ku kabina, Poliisi bwe yabadde eteeka mu nkola essaawa za Kafyu, ezaalangiriddwa omukulembeze w’eggwanga.
Yoweri Museveni yalangiridde Kafyu, okuva ssaawa 1 ey’akawungeezi okutuusa ssaawa 12 n’ekitundu ez’okumakya mu ggwanga lyonna ng’emu ku ngeri y’okutangira ‘Corona Virus’.
Wabula, Poliisi egamba nti owa bodaboda ategerekeseeko erya Vincent myaka 30 yakubiddwa essasi, bwe yagyemedde ebiragiro by’omukulembeze w’eggwanga ebya Kafyu.
Okusinzira ku mwogezi wa Poliisi mu Kampala n’emirirwano Patrick Onyango, Vincent, abasirikale baamuyimirizza mu katawuni k’e Kisimbiri mu disitulikiti y’e Wakiso nagaana okuyimirira.
Onyango agamba nti Vincent yabadde alemeddeko okutomera omu ku basirikale kyokka yagudde wansi, nakwata omu ku basirikale Isaac Kabos amalaka era amangu ddala omusirikale omulala Stephen Wafula yakubye essasi eryamukutte ku kabina.
Mu kiseera kino Vicent ali mu ddwaaliro ekkulu e Mulago era Poliisi egamba nti essaawa yonna bagenda kumugyako sitetimenti.
