Minisita omubeezi ow’ensonga z’omunda mu ggwanga, Obiga Kania alabudde ebitongole ebikuuma ddembe, okuteeka mu nkola ekiragiro ky’omukulembeze w’eggwanga Yoweri Kaguta Museveni, eky’obutakiriza bodaboda kusigala ku kkubo okusukka essaawa 8 z’amalya g’ekyemisana n’okutandiika olunnaku olwaleero ku Lwokuna nga 9, April, 2020.
Museveni bwe yabadde ayogerako eri eggwanga mu kiro ekikeseza olwaleero, yalagidde bodaboda okusigala nga zikola okuva ku makya ssaawa 12 n’ekitundu nga Kafyu aweddeko, okutuusa ssaawa 8, nga batambuza ebitereke nga byonna bikolebwa, okutangira ‘Corona Virus’ okusasaana.
Minisita Kania mu kwogerako eri bannamawulire ku Media Centre mu Kampala enkya ya leero, alagidde ebitongole eby’okwerinda okukwata bodaboda zonna, ezinaasangibwa nga ziremedde ku kkubo okusukka essaawa 8.
Minisita asabye abali mulimu gwa bodaboda, okuteeka mu nkola ebiragiro ebyayisiddwa okusinga okusika omuguwa.
Uganda mu kiseera kino erina abalwadde ba Corona Virus 53.
