Bya Nalule Aminah
Poliisi mu Kampala ekutte ppikipiki eziwerako mu kikweekweeto ekikoleddwa, okukwata aba bodaboda abagyemedde ekiragiro ky’omukulembeze w’eggwanga Yoweri Kaguta Museveni.
Pulezidenti Museveni bwe yabadde ayogerako eri eggwanga, yakirizza bodaboda okusigala nga zikola omuli okutambuza emmere okuva ku makya okutuusa ssaawa 8 ez’emisana kyokka tezikirizibwa kutambuza bantu.
Ekiragiro, ekitandise olwaleero era okuva ku ssaawa 8, abasirikale nga bayambibwako aba LDU batandikiddewo okukwata ppikipiki eziri ku kkubo.
Mu bitundu bya Kampala ku Poliisi y’e Kabalagala, omusasi waffe watuukiddeyo ku ssaawa nga 9 ez’akawungeezi nga ppikipiki ezisukka 30 zikwattiddwa.
Ku Poliisi y’e Mawanda e Kamwokya, ezisukka mu 10 zikwattiddwa, mu bitundu bye Ntebbe bangi ku bali mulimu gwa bodaboda bakaaba olwa ppikipiki okutwalibwa.
Linda ebisingawo
