Wuuno omukyala omutuuze mu disitulikiti y’e Kasese akutte akati mu kutuunda emmese, okunoonya ssente mu kulabirira famire ye.
Omukyala Annie Bembe ali mu gy’obukulu 30 agamba nti edduuka lye lyaggalwawo, okuteeka mu nkola ebiragiro by’omukulembeze w’eggwanga eby’okutangira Kolona okusasaana.
Bembe mukyala muzadde ng’alina abaana basatu (3) nga mutuuze mu katawuni k’e Mpondwe okumpi n’ensala y’eggwanga erya DR Congo.
Agamba nti olw’embeera, ng’alina okunoonya ssente okwebezaawo mu kiseera kino ekya Kalantini, abadde alina okunoonya okutunda ebintu ebiriibwa, abakulembeze okumukiriza okusigala ng’akola.
Bembe agamba nti mu kiseera kino, akeera kunoonya mmese mu nimiro ssaako n’okuzisuubula okuva ku batuuze abasobola okuzikwata era buli mmese agisuubula wakati shs 200 ku 300 okusinzira ku bunene bwayo.
Buli mmese etundibwa shs 1,000 oluvanyuma lw’okugikalirira era abazigula bannansi ba DR Congo ssaako ne bannayuganda abazitegeera obuwoomi omuli n’okuziteeka mu binyebwa.
Wabula Rev Pastor Pascal Kyakimwa agamba nti bangi ku batuuze bali mu mbeera mbi oluvanyuma lwa Gavumenti okuggala ensalo era okulya, ebintu ng’emmese tekyewunyisa.
