Poliisi mu Kampala n’emirirwano ekutte ppikipiki 35 mu kikwekweeto kya Poliisi okukwata bodaboda ku makubo okusukka essaawa 8 ez’amalya g’ekyemisana.
Sabiti ewedde, Pulezidenti Yoweri Kaguta Museveni yalagira bodaboda okusigala nga zikola okuva ku makya okutuusa ssaawa 8, okutambuza emmere kyokka tezikirizibwa kutambuza bantu.
Omwogezi wa Poliisi mu ggwanga Fred Enanga mu kwogerako eri bannamawulire ku Media Centre mu Kampala enkya ya leero, agambye nti okuva olunnaku olw’eggulo ku Ssande, baakutte ppikipiki 35 mu bitundu bya Kampala n’emirirwano.
Enanga agamba nti aba bodaboda basukkiridde emputtu era ppikipiki zonna ezikwatiddwa bagenda kuzikuumira ku Poliisi zaabwe okutuusa nga Corona Virus awedde mu Uganda.
Mu kiseera kino, Poliisi erina ppikipiki ezisukka mu 300 ezikwatiddwa okuva sabiti ewedde.
