Bya Nalule Aminah
Poliisi esse abantu babiri (2) ku babbi abaludde nga batigomya abatuuze b’e Mutundwe mu Divizoni y’e Rubaga mu Kampala era bonna bakubiddwa amasasi.
Okusinzira ku mwogezi wa Poliisi mu Kampala n’emirirwano Afande Patrick Onyango, ababbi basukka mu 10 era emisana ga leero, balumbye abatuuze ne batandika okubba.
Onyango agamba nti batuuze batemezza ku poliisi era amangu ddala abasirikale basitukiddemu okuyigga ababbi.
Onyango agamba ababbi baagadde okuduuka era Poliisi ekubyeeko abantu 2 amasasi agaabatiddewo, ate abasukka 8 bayingidde mu lutobazi mu bitundu bye Mutundwe kyokka abamu bakubiddwa amasasi era badduse n’ebisago.
Abattiddwa kuliko ategerekeseeko erya Bonny ne Kizza era basaangiddwa n’ebintu omuli kompyuta (laptop), Decoder za TV, ebijjambiya, Enjaga n’ebintu ebirala.
Onyango agamba nti okunoonyereza kulaga nti ababbi balina akayumba mu zzooni y’e Mirembe okumpi ne ppaaka y’e Nateete era gye baavudde okulumba abatuuze.
