Omulamuzi wa kkooti enkulu mu Kampala Wilson Kwesiga agaanye okuyimbula munnamaggye eyaganyuka Lt. Gen Henry Tumukunde eyali addukidde mu kkooti okusaba okweyimirirwa awoze ng’ava mu makaage ku misango egimuvunaanibwa.
Tumukunde ali ku musango ogw’okulya mu Nsi olukwe saako n’ogwokusangibwa ne by’okulwayisa mu ngeri emenya amateeka era omusango gwe gukyali wansi wa kkooti ku Buganda Road okutuusa ng’oludda oluwaabi lufundikidde okunoonyereza.
Wabula bannamateeka be, baddukira mu kkooti enkulu mu Kampala okusaba Tumukunde okweyimirirwa era baawa ensonga ez’enjawulo nti musajja ssemaka alina abantu abokulabirira, alina amaka e Kololo, alina endwadde ezimutawaanya, ddembe lye okusaba okweyimirirwa ssaako n’ensonga endala.
Enkya ya leero, kkooti ebadde ekubirizibwa omulamuzi Kwesiga egobye okusaba kwa Tumukunde.
Omulamuzi agambye nti embeera eri mu ggwanga olwa ‘Corona Virus’, oludda oluwaabi terusobola kwetaaya bulungi okunoonya obujjulizi, kwe kulagira Tumukunde asigale mu kkomera waakari omwezi gumu.
Mungeri y’emu Omulamuzi agambye nti Tumukunde ateekeddwa okweyimirirwa abantu abali ku ddaala lye erya Lt. Gen mu kitongole ky’amaggye oba okumusingako era amuwadde amagezi okuddamu okusaba okweyimirirwa.
Omulamuzi olumaze okuwa ensale ye, Tumukunde asabye okwogerako ne bannamateeka be abakulembeddwamu Oscar Kambona era abantu bonna bagobeddwa mu kisenge kya Kkooti.
Tumukunde olunnaku olwaleero, asinzidde Luzira mu nkola empya eya ‘video conferencing’ era Omulamuzi Kwesiga abadde atudde mu kkooti ya Buganda Road okuwa ensala ye.
Tumukunde eyeegwanyiza obukulembeze bw’eggwanga lino yakwatibwa okuva e Kololo nga 12, Ogwokusatu, 2020.
Tumukunde wakudda mu kkooti nga 6th, May, 2020.
