Poliisi mu Kampala ekutte abantu abasukka 200 abakeera okutambula okuyigira ekibuga ne badda mu kutayaaya n’okutuula ku mbalaza.
Mu kikwekweeto, n’abasuubuzi mu Kampala abaggula amaduuka gaabwe nga tebatunda mmere, bakwattiddwa.
Amyuka adduumira Poliisi mu Kampala n’emirirwano Afande Namuwoza Dennis yakulembeddwamu ekikwekweeto mu Kampala wakati, Wandegeya, mu bitundu bye Katwe ssaako ne Kampala Mukadde era abakwate, bali ku Poliisi ez’enjawulo.
Mu kuggala amaduuka ssaako n’okukwata abantu, Afande Namuwoza alabudde nti abantu okung’anira wamu, y’emu ku ngeri eyinza okuviirako ‘Corona Virus’ okusasaana.
Ate ssentebe w’ekitundu awasangibwa e Kikuubo mu Kampala Bashir Muwonge agamba nti waliwo abasuubuzi abalina emputtu nga berimbika mu kutunda emmere ne batunda ebintu ebirala omuli n’okutunda omwenge.
Alabudde abasuubuzi okusigala awaka, okwewala okugyemera ebiragiro bya Pulezidenti Yoweri Kaguta Museveni ebiziyiza abantu okulwala Kolona.
Amyuka omwogezi wa Poliisi mu Kampala n’emirirwano Luke Owoyesigyire agambye nti abantu abakwattiddwa bakuumibwa ku Poliisi ez’enjawulo ku misango egy’enjawulo.
Mungeri y’emu Owoyesigyire agambye nti ekikwekweeto kigendereddwamu, okukwata abantu bonna, abagyemedde ebiragiro by’omukulembeze w’eggwanga eby’okusigala awaka okutangira Kolona okusasaana era kikoleddwa okukendezza omujjuzo mu Kampala.
