Ssentebbe w’ekibiina ki NRM era omukulembeze w’eggwanga lino Yoweri Kaguta Museveni ku lwa Gavumenti ye asiimye abasawo bonna mu ggwanga, abakoze omulimu ogw’amaanyi, okulwanyisa Kolona obutasasaana ssaako n’okujanjaba abalwadde.
Webukeeredde nga Uganda ewezezza abalwadde 74 oluvanyuma lw’okuzuula Baddereeva 11 abatambuza ebyamaguzi nga balwadde okuli bannansi ba Tanzania 6 ne bannansi ba Kenya 5.
Abantu 46, Uganda ebasiibudde mu ddwaaliro nga bawonye ekirwadde okuva ku ddwaaliro Entebbe, Mulago ssaako ne Hoima.
Wabula Omukulembeze w’eggwanga agambye nti abasawo bakoze omulimu ogw’enjawulo okutaasa obulamu bw’abantu era betaaga okusiimibwa.
Museveni okwongera okusiima abasawo, asinzidde ku kisaawe e Kololo bw’abadde awaayo emmotoka kapyata 45 ezaweebwayo abazirakisa, ziyambeko okulwanyisa ekirwadde ki Covid-19.
Asiimye abantu bonna, abawaddeyo okuddukirira omuli n’emmere.
Mungeri y’emu alabudde amalwaliro agafunye emmotoka okuli eddwaaliro ekkulu e Ntebbe, Hoima, Kiruddu ssaako n’amalala obutazikozesa kulya masaali wabula okuzeyambisa mu kuweereza abantu.
