Lieutenant General Muhoozi Kainerugaba mutabani wa Pulezidenti Yoweri Kaguta Museveni alaze nti musajja wanjawulo nnyo ate muntu wa bantu wadde ali mu ssente.
Ku lunnaku Olwokutaano, Muhoozi yabadde ajjaguza amazaalibwa ge ag’emyaka 46 kuba yazaalibwa nga 24, April, 1974 era azaalibwa omukyala Janet Museveni.
Ku mulundi guno, Muhoozi yajjaguza amazaalibwa mu ngeri ey’enjawulo nga yasobodde okuyamba abantu okufuna eky’okulya.
Okusinzira ku Balaam Barugahara eyakazibwako erya Ssaabavvulu, buli mwaka ye ne banne babadde bagulira Muhoozi keeki ey’okusala ku mazaalibwa ge kyokka ku mulundi guno, yagaanye okumusalira keeki wabula okufunira abantu abali mu Kalantini e mmere.
Balam agamba nti asasaanyizza obukadde 72 okugulira abantu emmere ku mazaalibwa ga Muhoozi.
Muhoozi asobodde okweyambisa Balam okuwaayo ensawo z’akawunga 2500 n’ebijanjalo ensawo 500 nga bibalibwamu obukadde 72,000,000.
Mu lukiiko olugabira abantu emmere mu ggwanga olukulemberwa Mary Karooro Okurut, awaddeyo ensawo 1250, amaka gabakateyamba agakulemberwa Kalidinaali Emmanuel Wamala ensawo 100, Naguru Remand Home ensawo 100, ekibiina ekigatta abalema ensawo 100, abakyala abatunda ebintu ku nguudo z’omu Kampala abaakubwa emiggo gyebuvuddeko ensawo 100, abasiramu aba Uganda Muslim Supreme Council ensawo 50 ziyambeko abasiramu mu kisiibo.
Abayimbi ensawo 100, bannamawulire ensawo 100 ba DJ mu Uganda ensawo 100 n’abantu abalala.
Balam agamba nti Muhoozi ayagala nnyo abantu era y’emu ku nsonga lwaki avuddeyo okuyamba mu kiseera kino nga bangi ku bannansi betaaga eky’okulya okutaasa obulamu.
