Omubaka wa Munisipaali y’e Mityana, Francis Zaake kigambibwa atwaliddwa mu ddwaaliro e Kiruddu National Referral e Makindye, Kampala ng’ali mu mbeera mbi.
Kigambibwa nti nga April 19, 2020, Zaake yagabira abantu ku kyalo Buswabulongo mu disitulikiti y’e Mityana emmere oludda oluwaabi nga lugamba nti kino kyali kiyinza okuvaako okusaasaana kw’obulwadde bwa Corona era nga kikontana n’ebiragiro ebyaweebwa Pulezidenti Museveni.
Wadde mu kuwa ekiragiro kino Pulezidenti Museveni yagamba nti akwatibwa waakuvunaanibwa kugezaako kutta bantu, Zaake bwe yatwaliddwa mu kkooti e Mityana ku Mmande ya sabiti eno, omusango ogwo ku mpapula z’oludda oluwaabi tegwabaddeko.
Kigambibwa Zaake yatulugunyizibwa oluvanyuma lw’okukwattibwa wabula omwogezi wa Poliisi mu ggwanga Fred Enanga agamba nti omuntu yenna singa atulugunyizibwa, omubiri gulaga era agamba nti ensonga za Zaake singa kizuulibwa nti yatulugunyizibwa, Poliisi yakunonyereza.
Wabula omubaka we Kyadondo East, Robert Kyagulanyi Ssentamu (Bobi Wine) agamba nti Zaake atwaliddwa mu ddwaaliro e Kiruddu ng’ali mu mbeera mbi era nga akyali mu mikono gya poliisi.
Bobi agamba nti abasawo bakyakungaanya birowooza oba Zaake atwalibwa mu kasenge akajjanjabirwamu abantu abali mu mbeera embi, aka ‘Intensive Care Unit’ (ICU), “Hon. Francis Zaake’s health condition has worsened. He has now been placed on oxygen at Kiruddu hospital where he is currently admitted, still under police detention. The doctors are contemplating taking him into the ICU”.
