Bya NAlule Aminah
Ssemaka akulukuse amaziga ag’essanyu, mukyala we wakubyewo ezadde lya baana bana (4) kyokka asigadde asobeddwa n’okwebuuza, kyagenda okubaliisa mu kaseera kano aka Covid-19.
Ssemaka Frank Katuleebe mutuuze ku kyalo Kikoko mu Gombolola ye Busukuma mu Municipaali ye Nansana mu disitulikiti y’e Wakiso, omulimu gwe avuga bodaboda, agamba nti mukyala we Agnes Kyarikunda azaalidde mu kaseera nga takyakola.
Katuleebe agamba nti mu kiseera kino talina wadde 100, okuggya omukyala mu ddwaaliro nga betaaga ssente emitwalo 50, 000 n’okufuna eby’okuliisa Nnakawere, kwekusaba abantu okuvaayo okumuddukirira.
Omukyala azaalidde mu ddwaaliro e Kawempe oluvanyuma lwa Ambulensi okumuggya mu ddwaaliro e Kasangati olw’abasawo okutya okumukolako nga bayinza okulemererwa era ye n’abaana bali mu mbeera nungi.
Ate abatuuze ku kyalo bali mu ssannyu olwa mutuuze mu naabwe okuzaala abaana 4 wabula basabye Gavumenti okuvaayo okubakwasiza, okusinga ssemaka okudduka awaka olw’embeera.
