Ekitongole ky’amaggye ga UPDF kikutte omusirikale waabwe ku misango gy’obutemu oluvanyuma lw’okutta omusirikale ku ddaala eryawaggulu ku kitebe ky’amaggye e Nakasongola.
Munnamaggye akwattiddwa ye Lance Corporal Max Omutojo ku by’okutta omusirikale abadde ku ddaala lya ‘major’ n’okulumya omulala ali ku ddaala lya Lieutenant.
Major, yakubiddwa amasasi agaamutiddewo akawungeezi k’olunnaku olw’eggulo ku ssaawa 1.
Okusinzira ku Lt. Ibrahim Sekitto omwogezi w’ekitebe ky’amaggye e Nakasongola, Lance Corporal Omutojo ali mu kaduukulu kaabwe era okunoonyereza ku nsonga eyavuddeko ettemu kutandikiddewo.
Lt. Sekitto agaanye okwatuukiriza amannya ga ‘Major’ attiddwa ssaako ne Lieutenant alumiziddwa nga balina kusooka kutegeeza ku Famire ku nsonga z’omuntu waabwe okutibwa.
Emmundu, eyakozeseddwa okutta ‘Major’ ezuuliddwa ng’omusirikale eyalumiziddwa atwaliddwa mu ddwaaliro ly’amaggye e Nakasongola okufuna obujanjabi.
