Bannasayansi balabudde nti Kolona ayolekedde okusanira eggwanga Uganda singa omukulembeze w’eggwanga Yoweri Kaguta Museveni kamutanda nakkiriza okuggya abantu ku muggalo.
Omuggalo gw’ennaku 21 gugwako akawungeezi k’olunnaku olw’enkya nga 5, era omukulembeze w’eggwanga akawungeezi k’olunnaku olwaleero, alangiridde okwogerako eri eggwanga.
Wabula bangi ku bannansi bagamba nti, Mukulu Museveni ayinza okubakiriza okudda ku mirimu, okuzaaawo ebyentambula, abaana okubakiriza okudda ku massomero, Galagi ne saluuni okuziggulawo olw’embeera gye balimu nga tebalina kyakulya nga n’emmere, Gavumenti gyegabira abantu tebagirabako.
Wabula Dr Misaki Wayengera akulira Bannasayansi ku kakiiko k’eggwanga akali mu kulwanyisa Kolona aka National Task Force agambye nti singa Museveni akirizza abantu okudda ku mirimu, obulwadde bulina okweyongera.
Dr. Wayengera agamba nti okuggalo, guyambyeko Uganda okutangira abantu obutalwala kyokka singa abantu badda ku mirimu n’okubakkiriza okutambula, eggwanga lyolekedde akaseera akazibu nga bwe guli mu nsi z’ebweru.
Dr. Wayengera agamba nti Uganda yeetoloddwa amawanga agalina abalwadde abangi nga Tanzania erina 480, Kenya 435 ate Rwanda 225 nga waliwo okutya singa okuggalo guvaamu, abalwadde mu Uganda bayinza okweyongera okuva ku 89 olwa baddereeva abatambuza ebyamaguzi okuzuulwa nga balwadde omuli abava mu ggwanga erya Tanzania, Kenya ne Burundi.
